Bertsoa Unibertsitatean 2015-07-10

Transmisio-bide berriak

"Bertsolaritzaren bidegurutzeak" ikastaroaren bigarren saioa izan zen atzo Bertsoa Unibertsitatean zikoaren baitan. Jon Sarasua, Joseba Tapia eta Estitxu Eizagirrek transmisio-bide berrietarako hainbat gako eskaini zituzten.

Jon Sarasuak azken urteetan bertsolaritzaren transmisioa nola egin den kontatzeaz gain, aurrera begirako hainbat galdera jarri zituen mahai gainean. Hain zuzen ere, etorkizuneko kulturgintzan disziplina ezberdinak nahastu behar direla uste du Sarasuak eta bere iritziz, bertso-eskolek ere norabide horretan jarri behar lukete begia.

Estitxu Eizagirrek berriz "Bestelako bertso eskola bat" izeneko hitzaldia eskaini zuen. Egungo bertso eskolek egiten duten lanari baliorik kendu gabe, hainbat proposamen egin zituen bestelako eredu baten alde: etorkizuneko bertsoplazaren erreprodukzioa egin beharrean, bertsoa gaztetxoen bizitzaren erdigunean jartzeko gonbita egin zuen Eizagirrek.
 
Joseba Tapiak "Belarria soinu" izeneko hitzaldia eskaini zuen. Kantuen transmisioaz hitz egin zuen trikitixa eta gitarraz lagunduta; eta transmisio hori modu konprometitu eta kontzientean egitearen garrantzia azpimarratu zuen.

• 
•