Bertxoko sariketa 2007-11-10

Jokin Labayen eta Eneritz Artetxe dira lehen bi finalistak

Ariketa bereziz betetako saio batean, Jokin Labayen eta Eneritz Artetxe gailendu dira. Beste bi kanporaketa ere jokatuko dira eta bakoitzetik beste bina bertsolari sailkatuta, Gasteizen jokatuko den finala osatuko dute.

Jokin Labayenek hasiera hasieratik erakutsi zuen besteak baino koxka bat gorago zegoela eta bera izan zen sailkatuetako bat. Beste sailkatua Eneritz Artetxe azkoitiarra izan zen, bertsoa txukun txukun osatzen du eta tarteka txispa pittin bat falta izan bazitzaion ere, saio ona osatu zuen. Erregularra behintzat.

Gorabehera handiagoekin ibili ziren gainontzekoak. Hodei Iruretagoiena oso ale politak utzi zituen, baina parean asmatzen ez bazuen, oso behera jaisten zen eta Egun batez kanuto doinuan ezin asmatuta ibili izanak, finaleko ateak itxi zizkion zarauztarrari.

Olatz Ibarluzea, Iker Agirre eta Andere Arriolabengoari buruz ere gauza beretsua esan liteke. Saioari denek eman zioten zerbait, denek jartzen zuten ideia freskoren bat, baina tarteka bertsoa ezin osatuz ibili ziren eta hor atera zuten aldea Jokin Labayen eta Eneritz Artetxek.

Bigarren finalerdia Etxebarri-Ibiñan jokatuko da azaroaren 17an eta Agurainen jokatuko den hirugarren finalerdiarekin, hau azaroaren 23an, osatuko da Gasteizko finala.