Nerea Ibarzabal - Elkarrizketa 2017-07-27

"Bertsoari nire bizitzan zer pisu eman erabaki behar dut"

Nerea Ibarzabal bertsolaria (Markina-Xemein, 1994) Hitzetik Hortzera ikusi eta irratian bertsoak entzunez zaletu zen. Amaren aldeko familian zaletasun handia izan da eta ama-alabak elkarrekin kantari ere arituak dira. Iazko Bizkaiko finalaren ondotik jauzi bat egin du plazan eta Ibarzabalek aitortu du erabaki batzuk hartzeko garaian dagoela. Horietako bat, bertsoak zein pisu izatea nahiko lukeen bere bizitzan. Ez du bere burua identifikatzen bertso estilo batekin, denetik du gustuko, baita beste dispiplinak ere, rapa bereziki. Zenbaitetan sentitzen du bertsolariari ahots propioa izatea goizegi eskatzen ote zaion "Batzutan nahiko nuke 35 urte izan eta dena garbi eduki. Baina 23 ditut". Plaza handiei urruntasun puntu bat sumatzen die. Txapelketa Nagusian kantatuko du, aukera aprobetxatu nahi du dakiena egiteko eta diskurtso aldetik egin nahiko luke lanketa gehiena. Genero berdintasunean aurrerapen handiak ikusten ditu eta asko eskertzen du emakume sare bat antolatuta eta lanerako prest egotea.