Donostian izan da aurkezpena 2018-11-27

Bertsolaritzaren bilakaera genero ikuspegitik azaltzen duen infografia aurkeztu dute

Bertsolaritzaren bilakaera genero ikuspegitik erakusten duen infografia aurkeztu dute Donostian. "Publikoki bertsotan egiten ez zuen emakumerik ez ezagutzetik emakume bertsolari belaunaldi oso bat plazetan ikustera igaro gara" adierazi dute aurkezpenean.

Ainhoa Agirreazaldegi, Uxue Alberdi, Miren Artetxe eta Ane Labakak landu dute gaia eta Txakur Gorria kolektiboko Malen Amenabarrek eta Mariñe Arbeok eraman dute irudietara, modu artistikoan eta begi kolpe azkarrean josotzeko moduan.

"Emakume bertsolariek, plazan lekua hartzeaz gain, begirada feminista ekarri dute bertsotara bertsolaritzaren sistema berrikusteko premia nabarmen utziz", adierazi dute.

Elkarlan asko bildu dituen proiektua izan da. Besteak beste, Argia Astekaria, Berria egunkaria, Jakin eta Lanku Bertso Zerbitzuak.  Eusko Jaurlaritzaren laguntza ere jaso du proiektuak. Horiek guztiek ere parte hartu dute proiektuaren aurkezpenean.