AMAraun ikuskizunaren aurkezpena ostegunean 2022-04-05

"Amatasunaren inguruko gogoeta gure gorputzera ekartzea erronka izan da"

Oihana Iguaran eta Amaiur Luluagak ostegunean aurkeztuko dute AMAraun amatasunaren inguruko gogoeta, bertso, dantza, musika eta antzerkia uztartzen dituena. Amasa-Villabonan da, Gurea Antzokian, 19:30etan. Ikuskizun berriaren sortzaileek Bertsoa.eus-i kontatu dizkiote emanaldiaren gakoak, helburuak eta xehetasunak.

Hau bidaia bat da
Iguaran eta Luluagak ohartarazi dutenez, "Ez aurreikusi dantza ikuskizun bat, ez espero bertso emanaldi bat; hau bidaia bat da. Bidaia hipotetiko bat amatasunean zehar. Bidean, gorputzak, ahotsak, dantza eta bertsoa gurutzatu zaizkigu. Eta amatasunak gurutzatu gaitu."

"(Ama) izan ala ez izan” erabakitik abiatuko da emanaldia, eta horrek amatasunaren esperientzia batzuk agertzeko bidea eskainiko die Iguaran eta Luluagari, "ezagutzen ditugun ereduen eta gustatuko litzaizkigukeen ereduen arteko joan-etorrian. Enpatia eta aitortza ariketa bat amatasun mota guztiekiko, eta hausnarketa bat gizartean figura horrek betetzen duen paperarekiko".

Bertsoa eta dantza kontakizun batean
Amaraunaren sortzailei proiektu artistiko bezala berritzailea iruditzen zaie bertsoa eta dantza elkarrizketan baliatzea, baina ez bakoitza bere aldetik, kontakizun baten elementu banaezin bezala baizik. "Ez dugulako bertsoa dantzatuko, edo dantza bertsotan emango. Istorio bat kontatuko dugu eta  horretarako eskura dugun lengoaia guztia baliatuko dugu: musika, gorputza, ahotsa, hitza, espazioa, eszena... Erronka gisa ikusten dugu figurak lausotzea ere, dantzaria kantura ekarriz eta bertsolaria dantzara."

Begirada, desberdintasuna
Emanaldi honen desberdintasuna begirada litzateke, Iguaran eta Luluagaren arabera. Aipatutako eredu gehienek amatasunaren instituzioa edo esperientzia bera aletzen dituzte diote, gehienetan barrutik begiratuta. "Guk kanpotik begiratu nahi diogu, (ama) izan edo ez erabakitzerakoan eragiten duten faktoreak aletuz, zalantza arakatuz eta amatasuna alaba gisa ere hausnartuz."

Estreinaldirako sarrerak salgai
Amaraun lanaren estreinaldia Amasa-Villabonako Gurea Antzokian, ostegunean, 19:30etan. Sarrerak eskuragarri daude.

Albiste gehiago

Jone Larrinaga Dañobeitia - Bertsolari Bertsozale Podkasta 2024-03-28

«Bertsolaritzaren garapena aberatsagoa da espektatibarik gabe»

Mikel Artola Izagirre - Gipuzkoako Bertsozale Elkarteko koordinatzailea 2024-03-26

«Gipuzkoan 10-50 urte bitarteko bertsolari ia denek kantatuko dute udaberrian»

Juanjo Uria Zubiarrain - Bertsolari bertsozale podkasta 2024-03-15

Juanjo Uria: bertsoa eragiletzatik eta pasiotik bizi duen hernaniarra

Araitz Katarain, Izaro Bilbao eta Janire Arrizabalaga - elkarrizketa 2024-03-13

«Bertso munduratze prozesu horretan sortzen diren gatazkak gorpuztuko ditugu, mimoz, arduraz eta umorez»

Larunbat gauean 21:00etan ETB1en 2024-03-07

Hitzetik Hortzera Xabier Rico Arabako txapel emailearekin