'Uztapide plazara' Zestoan, gaurtik igandera 2022-05-17

'Nire Uztapide' liburuaren aurkezpen musikatua gaur Zestoan

Manuel Olaizola Uztapide bertsolari handia belaunaldi gazteengana hurbiltzeko Uztapide plazara ekimena antolatu dute Zestoan eta gaur bertan hasiko da. Arratsaldeko 19:00etan, kultur etxean, Pako Aristik idatzitako Nire Uztapide liburuaren aurkezpen musikatua izango da lehenengo ekitaldia. Hizlari, Pako Aristi eta Joxe Kruz Ezeiza arituko dira. Musikari lanetan: Aizpea Aristi eta Ioritz Zunzunegi. Nire Uztapide Manuel Olaizolaren biografia nobelatua da, gazteentzeko erakargarri izateko klabean idatzia. 2000. urtean argitaratu zuen Bertsozale Elkarteak eta joan den astean berrargitaratu zuen Erein argitaletxeak.

Ekimenak beste hiru ekitaldi izango ditu astean zehar. Igandean amaituko da txapeldunen jaialdiarekin.

Maiatzak 19, osteguna:
19:00etan, Kultur Etxeko aretoan, Uztapide, bertsotik prosara hitzaldia, Xabier Amurizaren eskutik.

Maiatzak 20, ostirala:
19:00etan, Arroabeko eskola zaharrean: Arroa inguruko bertso historia; txapel bat mila buru hitzaldi-tertulia.

Maiatzak 22, igandea:
18:00etan, Zestoako kiroldegian: Txapeldunen Bertso Jaialdia: Sebastian Lizaso, Andoni Egaña, Maialen Lujanbio, Amets Arzallus eta Xabier Amuriza.