Ikus-entzunezko bertsoak 2023-01-20

Anonyme Popular Azpeitian estreinatuko dute urtarrilaren 29an

Igor Elortzak eta Rafa Ruedak ondutako Anonyme Popular proiektu berria Azpeitian estreinatuko dute zuzeneko formatuan. Urtarrilaren 29an izango da, igandean, Soreasu Antzokian, arratsaldeko 19:00etan. Ikus-entzuneko bertso gisa definitzen ditu egileak eta Bertsoa.eus-en aitortu zuenez «oso neuretik jarritako bertsoak dira eta aldi berean beste askorenak izan daitezkeenak». Gai intimoak, sozialagoak zein politikoagoak lantzen ditu Elortzak, «etxeko zorroztasunetik» landuta. Dagoeneko sarean zabalduak dituzte hainbat kantu eta disko liburua atera ere bai.

10 ekitalditik gora agendan
Anonyme Popular, Larrabetzun lagunarteko aurkezpena eginda, Azpeitian abiatuko da eta beste hamar ekitalditik gora iragarrita daude maiatza bitartean. Otsailean bertan, bost: Zarautzen, Elorrion, Iruñean, Hernanin eta Oñatin izango da ikusteko aukera. Martxoan, Bilbon, Amasa-Villabonan, Amurrion eta Baigorrin. Maiatzean, Durangon.



d