Irati Alcantarilla - Mikel Laboa Sariketako irabazlea 2023-02-13

«Momentu honetan bertsoa nire erdigunea da eta bertsotan izugarri gozatzen dut»

Irati Alcantarillak irabazi berri du Mikel Laboa Sariketaren X. edizioa, Donostian, Ekhiñe Zapiainekin buruz burukoa jokatuta. Lehendik ere bazekien zer zen gazte sariketak irabaztea. Besteak beste, Xenpelar Saria irabazi zuen abenduan Errenterian.

Urruñarra gustura aritu zen bertsotan eta tenple onean sentitu zuen bere burua, bai kantuan, bai kantukideak entzuten. Doka aretoko toki bilduak eta entzuleen beroak ere lagundu zutela aitortu.

Ikastolan bertsozaletu zen Ancantarilla, etxetik zekarrenari bultzada emanez, Bertsularien Lagunak eta Seaskak lankidetzan duten proiektuari esker. Ikastolatik bertso-eskolara pausoa eta Urruña, Hendaia eta Irungo bertso-eskoletan ibilia da eta Errenteriakoa dabil egun. Lanbidez, berriz, Bertsularien Lagunak Elkarteko bertsolaritza irakasle da Seaskan. «Odei etorri zen behin gure eskolara eta orain ni naiz Odei» dio ironiaz, zikloa osatu dela adierazteko.

Bertsolaritza bizitzaren erdigunean sentitzen du Irati Alcantarillak eta bertsotan gustura dabil. Duela urte eta erdi ez bezala, orain sentitzen baduela zer kantatu eta badakiela nola, eta horrek gozatu handia ematen dio.

Entzun sareko plazan bertsolari urruñarraren balorazioa Mikel Laboa Sariketaren lanaz, bere gustuko bertso moldeaz, plazako ibilia eta, oro har, bere bertsolaritza lekukotasuna.