Aurten 10. edizioa izango da 2012-02-16

Martxoak bertsoa ekarriko du berriz Zumarraga eta Urretxura

 2003an hasi zen Zumarraga Urretxuko bertso-eskola Martxoan Bertsoa zikloa antolatzen. Ordutik handitzen joan da egitasmoa, eta indartsu iritsi da hamargarren ediziora. Aurtengoan otsailaren bukaeran hasi eta apirilera bitarterako egitarau zabala prestatu dute.

 Lehendabizi, motorrak berotze aldera, bertso-kirol desafioa antolatu dute zenbait "sari-bertsolari-kirolariren" eskutik. Otsailaren 25ean izango da hitzordua, Aizpurutxoko frontoian. Kirol desafioa egingo dute bertan. Ondoren Itziar jatetxean bazkaldu ostean, bertso desafioa burutuko dute.

 Eta martxoa iristearekin batera, hilaren 2an, Bertsolari Gazteei zuzendutako Aizpurutxo Sariketa egingo dute bigarrenez. Ostiralez izango da sariketa Aizpurutxoko Itziar jatetxean, iluntzeko 21etan. Txartelak aurrez salgai egongo dira. Honako bertsolari hauek kantatuko dute sariketan:

 Eneritz Artetxe
 Jokin Sudupe "Pio"
 Amaia Iturriotz
 Manex Mantxola
 Mikel Iturriotz
 Maialen Akizu
 Beñat Torres

 Behin martxoan sartuta, klasiko bat iritsiko da: taldekako bertsolari txapelketa. Bost saio eta finala jokatuko dituzte. Honako hau da egutegia:

 MARTXOAREN 3a, LARUNBATA
 Gaueko 23etan Legazpiko Arrano tabernan

 MARTXOAREN 9a, OSTIRALA
 Gaueko 23etan Aldiri tabernan

 MARTXOAREN 10a, LARUNBATA
 Iluntzeko 19etan Ezkio-Itsasoko Igartubeiti baserrian
  Bertara joan eta itzultzeko autobus zerbitzua egongo da Zumarragatik. Bertan jateko eta kupeletako sagardoa edateko aukera egongo da. Trikitilariek girotuko dute saioa.

 MARTXOAREN 16a, OSTIRALA
 Gaueko 23etan Fox tabernan

 MARTXOAREN 17a, LARUNBATA
 Gaueko 23etan Motz tabernan

 Finala hilaren 23an jokatuko dute, gaueko 23etan Gaztelekun


 Martxoaren 17an, berriz, larunbatez, goizeko 11:30etan Zelai Arizti kultur etxean, hitzaldi-tailer bat antolatu dute honako izenburu honekin: "Bertsolaritza lantegian, bertsoak industrian, bertsoak katean". Asier Iriondo ariko da hizlari lanetan.

 Martxoaren 31n, larunbatez, Musikala antolatu dute Labeaga aretoan. Gaueko 22:30etan izango da emanaldia, eta bertso-eskolako kideez gain herriko zenbait musikari, dantzari eta artista ere ariko dira bertan.

 Aurtengoan apirilean ondo sartuta bukatuko da Martxoan Bertsoa zikloa. Urtarrilaren bukaeran amaitu zen Bertso Sorkuntza lehiaketan parte hartzeko epea, eta apirilaren 20an egingo dute sari-banaketa, iluntzeko 19:30etan.

 Hurrengo egunean bertso-afaria egingo dute Motz tabernan. Agin Rezola eta Beñat Lizasok kantatuko dute bertan. Iluntzeko 21etan hasiko da afaria. Txartelak aurrez salgai jarriko dira.

 Azkenik, gaztetxoak bertsozaletzeko ere zenbait ekimen antolatuko dituzte. Martxoaren 18an, igandez, "Ezetz lortu" trebezia lehiaketa berezia egingo dute Labeaga aretoan, arratsaldeko 17etan.

 Bukatzeko, martxoaren 23an, ostiralez, Zumarraga-Urretxuko Eskolarteko 25. bertsopaper lehiaketako sari-banaketa ekitaldia egingo dute 15etan Zelai Arizti aretoan.

• 
•