Bertsolari Txapelketa Nagusiko bertsoaldi historikoak 2017-07-14

Andoni Egañak buruari kantatua

Ariketa berri batekin iritsi zen 1997ko finala: hitz bat deskribatu behar zuten bertsolariek. "Burua" hitza egokitu zitzaion Andoni Egañari eta ale antologikoa osatu zuen.

Udazkenean hasiko da Bertsolari Txapelketa Nagusia. Bien bitartean, motorrak berotze aldera, 1986tik hona jokatutako finaletako bertsoaldirik onenak ari gara errekuperatzen Bertsoa.eus-en.

Berritasunez betetako finala 1997an

Berrikuntza askorekin iritsi zen 1997ko Bertsolari Txapelketa Nagusiko finala. Bertsolari belaunaldi berri bat iritsi zen, finalean eskarmentu handia zuten bertsolariekin batera (Andoni Egaña eta Sebastian Lizaso) bigarren finala zuten Unai Iturriaga, Aritz Lopategi eta Mikel Mendizabal eta lehenengoz finalean aritu ziren Jon Maia, Maialen Lujanbio eta Jexux Mari Irazu jardun baitziren.

Baina berritasuna ez zen bertsolariena soilik izan, ariketetan ere nobedadeak izan baitziren. Bertsolariak lehendik ere aritu izan ziren hitza emanda. 1997ko finalean, ordea, hitz bana deskribatu behar izan zuten hamarreko txikian.

Andoni Egaña doinu berrian

Egun hartan Andoni Egañak kantatutakoa bertsozale askoren gogoetan iltzatuta geratu zen. "Batzutan da argia" doinu berrian deskribatu zuen "burua" hitza, bertso bukaeran kontraste ederra eginda.