Ane Labaka - II. Señora Sariketako irabazlea 2022-06-08

«Saio hasieratik hunkituta egon naiz»

«Oso-oso polita izan da» atera zaio Ane Labaka Mayoz barrutik finala bukatu berritan. II. Señora Sariketako irabazleak adierazi du hunkituta egon zen saio osoan zehar: «katalanak igo diren momentutik asko emozionatu naiz, Rosik (Rosi Lazkano) kantatu duenean ere bai, gu bertsotan ari ginenean ere bai... Denbora guztian oilo ipurdiarekin bezala egon naiz. Oso eroso eta oso gustura». Lasarte-Oriako bertsolariak aitortu du gogo handiarekin joan zela finalera eta bertsotan gustura sentitu dela. 

Festaren parte eguerditik
Bertsotan egin behar denean ez da beti erraza kanpoko festan zenbateraino murgildu neurtzea. Hori ere taldean adostu dutela azaldu du Labakak. Eguerditik izan ziren Leitzan, gaztetxean bazkaldu zuten besteekin batean eta gero kontzentratzeko tartea hartu zuten bertsolariek.