Argitalpenak 2019-09-25

Kalean da Bertsolari aldizkariaren udazkeneko alea

Aurtengo Bertsolari aldizkariaren azken alea izango da argitaratu berri den hau, hurrengoa NORI komikia izango baita, NOR-en jarraipena. Hainbat eduki interesgarri dakartza udazkeneko uztak.

Hitzak Iraolatarrei

Zaldibiatik berri goibelak iritsi dira aurten. Bi hilabete inguruko tartearekin hil dira Patxi Iraola eta Rufino Iraola anaiak. Euxebio Igartzabal bertsolariak gertutik ezagutu zuen Patxi, eta bere inguruan idatzi du; ariketa berdina egin dute Antton Kazabonek -Rufinoren lagunak- eta Bianditz Iraolak -Rufinoren semeak-.

Bertsolamintza jardunaldien lagina

Aurten buru-belarri aritu da lanean Bertsozale Elkartea bertsogintzaren inguruko azterketak eta ekarpenak egiteko plaza antolatzen: Bertsolamintza. Bosgarren aldiz egin dira jardunaldiok (1994, 2002, 2005, 2011 eta 2019), eta horietan parte hartu duten zenbait hizlarik berain gogoetak elkarbanatu dituzte aldizkarian ere.

• Feminismoa eta bertsogintza, gai-jartzailearen talaiatik. Maite Berriozabal
• Politikoki zuzena denaren eta transgresioaren arteko talka. Sustrai Colina
• Hizkuntza ideologiak bertsolaritzan. Miren Artetxe
• Nola sortzen da bertsogintzari buruzko iritzi publikoa? Xabier Aierdi

Beñat Gaztelumendik jardunaldien inguruko ikuspegi orokorra azaldu du, Mintzola Ahozko Lantegiak ematen dion ikuspegitik.

Esperimentuak inprobisatzen

Bertsoekin esperimentatzen dabil bat baino gehiago. Beñat Krolem artistak Oholtza izeneko proiektua taularatu du. Bertsolariaren jardunari toki bat eskaintzen dion eraikuntza aldagaien multzoa da, mugikorra eta artikulagarria; Oihana Iguaranek erreportaje bat idatzi du gaiaren inguruan. Bestalde, Andoni Egaña bertsolariak narratzaile lanak egiten ditu, hitzez eta bertsoz, Eta zer gehiago? musika proiektuan, Xabier Lizaso eta German Ormazabal piano-jotzaileek euren istorioak piano doinuen bidez kontatzen dituzten bitartean. Andoni berak eman du bertan bizi izan duen esperientziaren berri.

Horrez gain, Zaldieroa, Izar Mendiguren, Iñaki Gurrutxaga, Xabier Zeberio, Aracelli Arguello, Oihane Perea, Eneko Sagardoy eta beste hainbat, ale honetako orrialdeetan.