Potokastak - bertso uhinak 2020-04-18

Sartu ohean eta jantzi izara burutik behera mamuen antzera

Maindirepean entzungo dugu gaurko uhin-sorta. Sartu ohean, kiribildu sofan edo jantzi izara burutik behera mamuen antzera. Eta adi gaurko bertso-uhinek dakartenari.

Izara artean uhinekin jolasean

Aitor Bizkarrak hartu gaitu Abadiñon. Bere bertso ibilbideaz, abesteko doinu gogokoenez eta xelebrekeriez galdetu diogu lehenengo. Eta zer moduz dabilen erantzun digu aurrena. Txikitako izarak, neguko eta udako izarak. Flanelazkoak, finagoak, hianbat kolore eta estanpaturekin. Izara deserosorik existituko al da? Eta lo egiteko izarekin leporaino tapatzen direnen zergatia… hori ezingo dugu inoiz jakin. 

Nolakoak dira Aitor Bizkarraren izarak?

Izarak eseki dituzte arropa zabaltzeko sokan. Gaur ere pixa egin duzu ohean eta beste behin ere garbitu behar izan dizkizute maindireak. Lotsa eta arduraren sentsazioak nahasten zaizkizu barruan. “Zer gertatzen zait?” pentsatu duzu. Eta hor zaude haizean dilin-dalatzen diren izarei begira.

 Zer kantatuko lioke Aitorrek gai honi?

Maindirepean entzun dugu gaurko saioa. Esna geundelakoan, edo agian lo? Edo ametsetan? Baina betiere bertsotan! Zaindu!