Bertsolari Txapelketa nagusiko bertsoaldi historikoak 2017-09-01

Andoni Egaña eta Amets Arzallus puntutan

 Udazkenean hasiko da Bertsolari Txapelketa Nagusia. Bien bitartean, motorrak berotze aldera, 1986tik hona jokatutako finaletako bertsoaldirik onenak ari gara errekuperatzen Bertsoa.eus-en.

 Finalean puntutan

 Plazako ohiko ariketa izaten da puntutan aritzea. Normalean, saioaren bukaera aldera, bertsolariak librean aritzen dira, ordura arte kantatuaren laburpena egin eta entzuleak zirikatzeko. Bertso-afari eta bazkarietan ere ohiko ariketa izan ohi da.

 Txapelketetan, ordea, puntutan ere gaiarekin aritu ohi dira bertsolariak, binaka. Azkeneko lau finaletan egin izan dute bertsolariek ariketa hau, eta finalaren ohiko erritmoa apurtu ohi du, bertsolariak bizi-bizi aritzen baitira, bertso osoaren kontrola galduta, elkarri erantzunez eta, ahal denean, errematea emanaz.

 2005eko saio ederra

 2005eko finaleko arratsaldeko saioan ere ariketa honetan aritu ziren bertsolariak. Bereziki gogoangarria izan zen Amets Arzallusek eta Andoni Egañak osatu zuten bertsoaldia, mutil-lagunekin barraketara joan diren bi neskaren paperetik.