POTOKASTAK - BERTSO UHINAK 2020-06-01

Nolako zapatillak erabiltzen dituzu etxean egoteko?

Ibai Amillategi

Gernikan daude uhinak gaur. Herri erdialdean bizi da Ibai Amillategi. 21 urterekin hasi zen Lilibertso bertsoeskolan eta hor jarraitu du ordutik. Rugbia da bere beste afizioetako bat eta kontatu digu saio on batean erabili duen arropa berriz ere janzten duela hurrengo saiorako.

Eurak jantzita sentiduten naz

Ez dakigu potokasta grabatzeko ere saio on baten arropa errepikatu duen Ibaiek edo etxean harrapatu dugun etxeko-arropa soinean. Gaur ez gara arropaz ariko, baina kontzeptua ez dago urrun. Ea ba, gaurko mintzagaia bertso baten bidez aurkeztuko diezuegu, entzun adi eta ea asmatzen duzuen zerri buruz arituko garen gaurko potokastean. Bota bertsoa Ibai!

"eurak jantzita sentiduten naz

iye onenen moduan"

Etxeko zapatillen katalogoa

Nolako zapatillak erabiltzen dituzu etxean egoteko? Eta ezagutu izan duzu etxeko zapatilla xelebrerik zure inguruan? Kolorea, testura, forma zaharrak, berriak? Marrazkiekin edo sinpleak? Nun gordetzen dituzu edo noiztik dauzkazu? Zein zenbaki dute? Kontatu, kontatu..!

Esaten dute zapatillek norbait nolakoa den esaten dezaketela

Jolas bat egingo dugu. Ibai Lilibertso-eskolako bi lagun sintonizatu dituzu honetarako. Kaixo Koldo Gezuraga eta kaixo Aitor Etxebarriazarraga! Ongi etorri!

Esaten dute zapatillek norbait nolakoa den esaten dezaketela. Jende ezagunaren hiru izen emango dizkizuegu. Zuek bertsotan horietako bakoitzak nolako etxeko zapatilak dituen esan beharko duzue, bere etxeko zapatillak bertso batean deskribatu. 

Hauek dira pertsonaiak, bakoitzari bertso bana kantatzeko:

• Aitor Nolakoak izango ote dira Maialen Lujanbioren etxeko zapatillak?
• Koldo Nolakoak izango ote ziren Mikel Laboaren etxeko zapatillak?
• Ibai Nolakoak izango ote dira Nekane Murga osasun sailburuaren etxeko zapatillak?

Ibairen bukaerako agurrarekin agurtuko gara.

Zaindu etxeko zapatillak eta zaindu zuek! Laster arte eta segi bertsotan!